Ինչպես ազատվել քրոնիկական հարբուխից

Վերջին տարիներին տառապում եմ քրոնիկական հարբուխով: Բժշկի խորհրդով երկար ժամանակ տարբեր դեղպատրաստուկներ եմ օգտագործել, սակայն արդյունքից այնքան էլ գոհ չեմ: Ժովովրդական ի՞նչ միջոցներ կան այն բուժելու համար:

Ն.Դանիելյան, ք.Երևան

Ժամանակակից մարդկանց բացարձակապես մատչելի են դեղպատրաստուկները: Պարբերաբար օգտագործելով արտասահմանյան և տեղական արտադրության որակյալ, իսկ երբեմն նաև ոչ այնքան որակյալ պատրաստուկներ, շատերն իրենց առողջությունը վտանգի տակ են դնում: Դրա վառ և դասական ապացույցն են զանազան աերոզոլներն ու քթի կաթիլները, որոնք արագ օգնում են որոշ ժամանակով հանել լորձաթաղանթի այտուցը և վերականգնել փակված շնչառությունը: Սակայն շատերը գործնականում չգիտեն, որ եթե դրանք օգտագործվեն 7 օրից ավելի, ապա հետևանքը կլինի մշտական այտուցը և, նույնիսկ,  քթի լորձաթաղանթի ապաճը: Խորհուրդ ենք տալիս օգտվել ժողովրդական հետևյալ բաղադրատոմսերից:

• Հետևյալ յուղերից կաթիլներ պատրաստել` էվկալիպտ, բերգամոտ, նարինջ և խորդենի:

10մլ ձիթապտղի ձեթի վրա ավելացնել նշված յուղերից 2-3-ական կաթիլ, խառնել և լցնել մուգ գույնի ապակյա տարայի մեջ: Խառնուրդը 3 շաբաթ թրմել, օրը 3-4 անգամ խառնելով: Քթի մեջ կաթեցնելուց առաջ, ցանկալի է ինհալացիա կատարել, ինչը թույլ կտա քթի լորձաթաղանթի վրա ուժեղացնել կաթիլների ազդեցությունը: Դրա համար բավական է տաք գոլորշու վրա շնչել 7-10 րպե:

• Կարելի է մումիայի հիմքով օգտակար և բուժիչ կաթիլներ պատրաստել:

Դրա համար 1 գրամ մումիան լուծել 1 թեյի գդալ տաք ջրի մեջ և թրմել 1 օր: Խծուծը թրջել այդ լուծույթով և քնելուց առաջ մի օր դնել մի քթանցքի մեջ, հաջորդ օրը` մյուսի: Բուժման կուրսը 1 ամիս է: Մումիան օգնում է լիարժեք վերականգնել քթի լորձաթաղանթի խանգարված գործառույթը և ազատվել անոթալայնիչ կաթիլների կախվածությունից:

Հարցեր, պատասխաններ, մեկնաբանություններ